周处除三害（转载的）
古辰光宜兴叫荆溪。周处是荆溪县西步村人，后来才搬到县城东门外头住。他个老子叫周鲂，做过太守，周处小辰光顽皮到勿得了，欢喜弄枪弄棒，力气又大，看到哪家勿顺眼，拔出拳头就打，勿晓则有多少人吃过佗个亏，呒不一个勿恨佗，拿佗又呒办法。
搿一天，佗走过东门菜花桥一爿酒坊，一只狗从酒坊里一窜出来，朝佗他汪几声。周处又发火咧：“你搿只鬃牲，来咬我周处嗒？”擒起脚就踢，狗被佗踢到汪汪直叫，满处乱跑。
酒坊老板看到是周处，要紧嗑头作揖，向周处赔罪，请周处饶啦搿只看家狗。周处恶声恶气气讲：“狗勿打杀，酒缸打翻！”老板呒办法想，眼睁睁看佗拿狗打杀啦。
周处打杀酒坊看家狗搿事体一息息就传遍全城。城里人都讲：本来荆溪有两害，现在变成则三害咧。一个老佬叫士吉，佗讲：“我来教训教训佗。”有人讲：“覅去送命吧”。士吉老汉讲：“我自有办法。”
士吉就登勒城门口候好则，一直候到吃过饭，周处摇啊摇，过来则咧。
士吉等周处走到面前，就自言自语讲：“周处搿只细鬃牲，要么我看勿见佗，看见佗要教训教训佗。”
周处听到有人讲要教训佗，就大喝一声：“呔！你讲底个！”
“我讲，念周处个父亲搭我是结拜弟兄，勿然要同佗拼命。”
周处本来要伸拳头，听到佗是父亲个结拜兄弟，就朆捋拳头。佗问士吉：“伲为底要同周处拼命？”
“近年来南山出则一只吊睛白额老虎，白日里都出来伤人；长桥底下一只蛟龙，年年要供祭它一个童男，否则兴风作浪，勿晓则伤则多少人命咧。如今又出则一个周处，横行乡里，为非作歹。连同南山白额虎，长桥水中蛟，已成荆溪三害，老百姓还有日脚过勿啊？拼也是死，勿拼也是死！”
“周处本事大，是少年英雄，哪会是荆溪一害？”
“哈哈哈！讲底个少年英雄，佗会斩蛟射虎，为民除害勿啊？”
“蛟龙老虎算底个，还会吃则住我个刀枪弓箭嗒？”讲完，周处转身就走。
周处跑到家，带上宝剑，背起弓箭，直奔南山。满山跑下来，寻勿到老虎。天晏下来则后，佗就蹲勒柴窠里头。勿一息，一阵风，呼——！一闻，风里有腥气，晓则是老虎，天晏，又看勿见老虎。
老虎蹲勒山头顶，尾巴甩呀甩，觉着越甩越重，还有点痛兮兮——原来一只夹蛇乌龟，齐头夹勒老虎尾巴上，尾巴越甩，夹得越紧。
搿辰光，一阵缸片云推过去，露出麻花亮月。几几乎是同一辰光，周处看见则老虎，老虎也看见则周处。
等周处挽弓搭箭，老虎四脚一蹬，直朝周处扑来。周处要发箭已经来勿及，料定必死无疑。哪垯晓则老虎个尾巴上夹着一只大乌龟，离开周处还有一线线，就从空中跌则下来。周处要紧弓拉满月，对准老虎头“嗒”一箭，射中老虎左眼。老虎痛到要死，纵身一跳，箭尾正好碰勒树丫枝上，箭头穿透后脑。周处见老虎跌勒地上，跑上去一看，箭勒老虎头上一个对穿过。他怕老虎勿死，又对准老虎右眼一脚，连眼乌珠都踢则出来咧。
周处拿老虎掮到家，拿老虎皮剥剥，虎骨熬熬，又烧一大锅老虎肉，请街坊邻居都来吃老虎肉。周处打死南山白额虎个事体一间间就传遍则荆溪城。大家都讲周处除啦一害，做则好事咧。
周处射死老虎，又去斩水中蛟。
搿辰光是十月天气，雾多，蛟龙身上痒，勒水里头蹲勿住，就要浮出水面。搿天大雾，周处身背宝剑，一个老早就来到长桥上。一息息，长桥底下水浪翻滚，水花飞溅。周处晓则蛟龙要出水咧，眼睛睁到蛮大，眨勿眨看好则水面。突然，一个浪头冲天而起，蛟龙半条身子露出水面。说时迟，那时快，周处手持宝剑，纵身一跃，正好骑勒蛟龙颈根头。周处左手紧紧握住蛟龙独角，右手拿宝剑对准蛟龙颈根刺下去，拼尽力道硬是刺勿下——龙鳞又厚又硬，坚硬如铁。
蛟龙觉着有人骑勒它颈根上，就拿尾巴用力一甩。周处听到背后阵风声，随首一低头，紧紧贴伏勒搿蛟龙身上。蛟龙个尾巴朆甩到周处，反而重重一记，甩勒自家头上，痛到直抖，朆想到它一阵抖，拿周处抖勒水勒咧。
搿辰光，蛟龙已经逃进太湖，周处勒水里头奋力追赶。眼看蛟龙越逃越远，周处见湖边有座山，就高声喊道：“山哥哥！山哥哥！快点帮我拦住它！”说也奇怪，周处话音刚落，搿座山真咾长一个山嘴，拿蛟龙拦住。蛟龙只好回头逃，齐头碰到后底追赶来个周处。周处一把抓住龙角，一个翻身又爬上龙背。
周处紧握剑柄，对准龙颈根死命刺，死命戮，还是戮勿进。佗就拿宝剑顺着龙颈根往下移，齐头戮勒命门里，一股腥血直冒出来。绯红个血一直淌到太湖边头一条港勒——蛟龙终于被周处刺死啦。周处拿蛟龙拖上岸，把龙角斩下来，又拿龙皮剥下来，挑着龙皮、龙角往城里去。
周处从东门进城，走经菜花桥酒坊，酒坊老板捧出一大坛酒，庆贺周处斩蛟射虎、为民除害。满城百姓也涌来看龙皮龙角，看斩蛟射虎个英雄。
周处悔过自新除三害，后来又听则士吉老佬的话，拜陆机陆云为师，终于成为一代名将。
后涉来，人们把周处开头用剑刺蛟龙个地方叫做“上移皮”，第二剑刺中蛟龙命门个地方叫“下移皮”，拦住蛟龙个山咀叫“拦山咀”，被龙血染红的港叫“红港”。因为蛟龙死啦咧，轮到供祭男童个村庄总算保住则男童，搿个村就开始叫“男留村”——搿些地名到今朝还一直存在。长桥也被改成蛟桥，连苏东坡还洗石题词：“晋平西将军周处斩蛟之桥。”( )